Humour régional

Aller en bas

Humour régional Empty Humour régional

Message par Gabriel Sam 02 Jan 2016, 21:29

Dans l'hypothèse où des habitants du Nord Pas-de-Calais (ou Nordpadkalé) Picardie se trouveraient sur le forum, et dans l'hypothèse un peu plus incertaine où ils liraient le patois local, je vous partage cette petite lettre politico-humoristique.

A l'occasion, j'en ferais une traduction Wink

Monsieur Xavier Bertrand,

Comme o z’allez arprésinter m’ Région , j’ supposse que vous comprénez l’ lanque des gins qui y vifent.

Ch’est donc dins l’ lanque là que j’ va vous écrire.

Hier , diminche, j’a voté pour vous !!!.

Bon , ch’ est vrai , que j’ sus t’ allé au bureau d’ vote à longs dints , avec l’ enthousiasme d’ un ojon qui vot arriver l’ cinsier , met s’ tiête sur eune racourche et qui a vraimint l’ impression que sin cul i sint l’ louchet ,…mais bon , j’ ai voté pour vous , in n’arvient pas la d’sus !

Dins l’ bureau d’ vote , sur eun' tap', j’ ai cuji deux bulletins pour faire mine d’ a rien et j ’ sus rintré dins l’ isoloir les larmes aux yux .

Au momint d’ ployer vou bulletin in huit et d’ l’intiquer dins ch'l’ inveloppe , j’ ai bien ravisé si ch’ rideau il étot bien freumé pour pas que personne i m’ voche, in a s’dignité, tout d’même!

J’ m’ apprétos à arsortir , et ch’ est là que j’ai intindu eune voix vénue du ciel !! J’ dos vous préciser que ch’ étot avant l’apéritif donc vous pouvez garder pour vous les réflexions désobligeantes qu’ o pourrête ête tenté d’ dire.

L’ voix, j’ l’ ai arconnue tout d’suite… Ch’étot l’ même voix que j’ intindos quand j’ avos dix ans et que j’ touillos mes lignes à l’pêque , ou bin quand j’ avos la drisse et que j’ devos avouer qu’ après avoir été à l’ marotte, j’ m’ étos ingalaffé d’poires pas mûrtes.

Ch’étot l’voix d’min grand-père !

« Quoi que t’é t’apprêtes à faire , tête ed’sot???? », qu’ alle dijot l’voix amiteusse vénue du ciel.

Faut vous dire Monsieur Xavier Bertrand , que min grand-père i a été licencié pindint les grandes grèfes in 48 et que li, et ses deux garchons , min père et min mononque , soulignés in rouche par les Compagnies des z’ Houillères, n’ ont jamais pu arvénir travailler dins l’ Région que vous allez diriger dins eune paire d’ jours.

Faut vous dire Monsieur Xavier Bertrand que tous les trois, pour continuer l’seul métier d’ mineur qui savettent faire, i z’ ont été obligés d’aller s’imbaucher i n Lorraine, dins l’ Anjou et dins les mines de Loire.

Faut vous dire enfin, Monsieur Xavier Bertrand , que min mononque il est mort de l'silicosse attrapée dins les ardoisières d’Anjou, que min grand-père il est mort d’ silicosse à l’hôpital Sainte Barpe d’ Bruay et que m’ mère n’ a eu l’ drot d’ arvénir dins l’Pas de Calais que quand min père il est mort au fond de l’ fosse d’ un accident, à 37 ans.

Tous les trois avettent enfin payé leu dette !

Alors forchémint Monsieur Xavier Bertrand , vous pourrez comprinte que j’ ai eu du maux à expliquer à min grand-père pourquoi que j’ m’ apprétos à voter pour un ancien Minisse d’ Sarkozy !

Comme i n’ont pas core Internet au ciel , il étot pas vraimint au courant du dallache.

J’ va m’ permette d’ vous donner un pétit consel, Monsieur Xavier Bertrand… Vénez à Lorette , allez à Vimy…respirez à pleins poumons l’air qu’ in y respire un jour d’ grand vint.

Allez à l’ pêque dins un flobard avec un pêqueux d’ Wissant, même si vous devez dégueuler tout l’journée.

Allez passer eune journée à Lewarde, monter in haut d’un terril et ravisez autour d’vous, à perte d’ vue vous verrez chuqu’ i fait note identité… Vous savez l’ Identité, chu que deux comarates à vous, Hortefeu et Besson, Minisses de l' Immigration, de l'Intégration, et de l'Identité Nationale, ont dessaqué d’un tiroir pour amuser chés gins que vous vénez d’batte aux élections !

Prénez vot' temps Monsieur Xavier Bertrand .

Allez faire pronne un jour d’ ducasse, ou d’carnaval d’ Dunkerque, poussez eune porte et allez minger un quartier d’tarte à libouli ou du pain d’tchien avec eune jatte d’café que vous buverez à l’chuchette.

J’ vous l’ deminte solennellemint Monsieur XavierBertrand , faijez pas l’bête ! N’ allez pas arfaire l’ coup d’ Chirac in 2002 qui n’ avot rien compris à s’ victoire !

Sinon... j’ m’ aurai esquinté pour arien à expliquer à min grand-père que j’ allos voter pour vous et alors là si un jour, l’ pus tard possipe j’ vous l’souhaite, vous allez l’ arjointe, j’cros que vous allez faire des progrès in patois, mais vous aurez du mau à arplacher sin vocabulaire dins vos soirées mondaines.

J’ vous armercie d’ m’ avoir lu .

Par conte j’ va attinte un p’ tit peu, d’ vous vire à l’ouvrache, avant d’ vous invoyer mes salutations les plus cordiales, pasque j’ai voté pour vous, mais de l’ main gauche, faut pas trop m’in deminder quand même !

Bertrand COCQ
Gabriel
Gabriel

Messages : 2311
Date d'inscription : 10/12/2015
Age : 52
Localisation : 59

Revenir en haut Aller en bas

Humour régional Empty Re: Humour régional

Message par Invité Lun 27 Juin 2016, 17:02


Invité
Invité


Revenir en haut Aller en bas

Revenir en haut

- Sujets similaires

 
Permission de ce forum:
Vous ne pouvez pas répondre aux sujets dans ce forum